ਆਦਮਪੁਰ ਤੋਂ ਮੁੰਬਈ ਲਈ ਇੰਡੀਗੋ ਦੀ ਸਿੱਧੀ ਉਡਾਣ ਸ਼ੁਰੂ...

ਇੰਡੀਗੋ ਏਅਰਲਾਈਨਜ਼ ਨੇ ਆਦਮਪੁਰ (ਜਲੰਧਰ) ਹਵਾਈ ਅੱਡੇ ਤੋਂ ਮੁੰਬਈ ਲਈ ਆਪਣੀ ਪਹਿਲੀ ਸਿੱਧੀ ਉਡਾਣ ਦੀ ਸ਼ੁਰੂਆਤ ਕਰ ਦਿੱਤੀ। ਇਹ ਪਹਿਲੀ ਉਡਾਣ ਮੁੰਬਈ ਤੋਂ ਯਾਤਰੀਆਂ ਨੂੰ ਲੈ ਕੇ ਦੁਪਹਿਰ 3.15 ਵਜੇ ਆਦਮਪੁਰ ਹਵਾਈ ਅੱਡੇ 'ਤੇ ਉਤਰੀ। ਇਹ ਸਿੱਧੀ ਸੇਵਾ ਉਡਾਣ (UDAN) ਸਕੀਮ ਤਹਿਤ ਸ਼ੁਰੂ ਕੀਤੀ ਗਈ ਹੈ, ਜਿਸਦਾ ਉਦੇਸ਼ ਛੋਟੇ ਸ਼ਹਿਰਾਂ ਨੂੰ ਵੱਡੇ ਸ਼ਹਿਰਾਂ ਨਾਲ ਜੋੜ ਕੇ ਆਮ ਲੋਕਾਂ ਲਈ ਹਵਾਈ ਯਾਤਰਾ ਸੁਲਭ ਬਣਾਉਣਾ ਹੈ।

ਇਹ ਨਵੀਂ ਉਡਾਣ ਤਖ਼ਤ ਸੱਚਖੰਡ ਸ੍ਰੀ ਹਜ਼ੂਰ ਸਾਹਿਬ (ਨਾਂਦੇੜ) ਜਾਣ ਵਾਲੇ ਸਿੱਖ ਸ਼ਰਧਾਲੂਆਂ ਲਈ ਖ਼ਾਸੀ ਸਹੂਲਤ ਸਾਬਤ ਹੋਵੇਗੀ। ਰਾਜ ਸਭਾ ਮੈਂਬਰ ਸਤਨਾਮ ਸਿੰਘ ਸੰਧੂ ਨੇ ਇਸ ਫੈਸਲੇ ਨੂੰ ਇਤਿਹਾਸਕ ਦੱਸਦਿਆਂ ਕਿਹਾ ਕਿ ਇਹ ਸਿੱਖ ਭਾਈਚਾਰੇ ਦੀ ਲੰਮੀ ਮੰਗ ਸੀ ਜੋ ਹੁਣ ਪੂਰੀ ਹੋਈ ਹੈ। ਖਾਸ ਕਰਕੇ ਬਜ਼ੁਰਗ ਯਾਤਰੀਆਂ ਲਈ ਇਹ ਸੇਵਾ ਇੱਕ ਆਸ਼ੀਰਵਾਦ ਵਰਗੀ ਹੋਵੇਗੀ, ਜੋ ਪਹਿਲਾਂ ਲੰਬੇ ਸਫਰ ਅਤੇ ਕਈ ਬਦਲਾਅ ਕਾਰਨ ਮੁਸ਼ਕਲ ਸੀ।

ਇੰਡੀਗੋ ਦੀ ਇਹ ਉਡਾਣ ਹਰ ਰੋਜ਼ ਚੱਲੇਗੀ। ਫਲਾਈਟ ਨੰਬਰ 6E 5931 ਦੁਪਹਿਰ 12.55 ਵਜੇ ਮੁੰਬਈ ਤੋਂ ਰਵਾਨਾ ਹੋ ਕੇ 3.15 ਵਜੇ ਆਦਮਪੁਰ ਪਹੁੰਚੇਗੀ। ਵਾਪਸੀ ਵਾਸਤੇ ਫਲਾਈਟ ਨੰਬਰ 6E 5932 ਦੁਪਹਿਰ 3.50 ਵਜੇ ਆਦਮਪੁਰ ਤੋਂ ਉੱਡੇਗੀ ਅਤੇ ਸ਼ਾਮ 6.30 ਵਜੇ ਮੁੰਬਈ ਪਹੁੰਚੇਗੀ। ਪੂਰਾ ਸਫਰ ਲਗਭਗ ਢਾਈ ਘੰਟੇ ਦਾ ਹੋਵੇਗਾ, ਜੋ ਕਿ ਸਮਾਂ ਅਤੇ ਥਕਾਵਟ ਦੋਵਾਂ ਤੋਂ ਬਚਾਅ ਦਿੰਦਾ ਹੈ।

ਇਹ ਉਡਾਣ ਨਾ ਸਿਰਫ਼ ਧਾਰਮਿਕ ਯਾਤਰਾ ਲਈ ਲਾਭਦਾਇਕ ਹੈ, ਸਗੋਂ ਵਪਾਰਕ ਹਿੱਤਾਂ ਲਈ ਵੀ ਮਦਦਗਾਰ ਸਾਬਤ ਹੋਵੇਗੀ। ਜਲੰਧਰ, ਨਵਾਂਸ਼ਹਿਰ, ਕਪੂਰਥਲਾ, ਹੁਸ਼ਿਆਰਪੁਰ ਅਤੇ ਦੋਆਬੇ ਦੇ ਹੋਰ ਖੇਤਰਾਂ ਵਿੱਚ ਵਪਾਰੀ ਵਰਗ ਨੂੰ ਮੁੰਬਈ ਨਾਲ ਸਿੱਧਾ ਜੁੜਾਅ ਮਿਲਣ ਨਾਲ ਨਵੇਂ ਵਪਾਰਕ ਮੌਕੇ ਮਿਲਣਗੇ। ਇਸ ਨਾਲ ਖੇਤਰ ਵਿੱਚ ਨਿਵੇਸ਼ ਅਤੇ ਰੁਜ਼ਗਾਰ ਦੇ ਚੰਨਣ ਹੋਣ ਦੀ ਸੰਭਾਵਨਾ ਹੈ।

ਇਹ ਸਿੱਧੀ ਉਡਾਣ ਕੇਂਦਰ ਸਰਕਾਰ ਦੀ ਉਡਾਣ ਯੋਜਨਾ ਅਤੇ ਛੋਟੇ ਹਵਾਈ ਅੱਡਿਆਂ ਦੇ ਵਿਕਾਸ ਵੱਲ ਇਕ ਵੱਡਾ ਕਦਮ ਹੈ। ਸਤਨਾਮ ਸੰਧੂ ਨੇ ਕਿਹਾ ਕਿ ਇਹ ਕੇਵਲ ਇਕ ਉਡਾਣ ਨਹੀਂ, ਸਗੋਂ ਸਿੱਖ ਭਾਈਚਾਰੇ ਲਈ ਇੱਕ ਸਨਮਾਨ ਦਾ ਪ੍ਰਤੀਕ ਹੈ। ਅਜਿਹੀ ਸੇਵਾਵਾਂ ਨਾਲ ਆਉਣ ਵਾਲੇ ਸਮੇਂ ਵਿੱਚ ਪੰਜਾਬ ਦੇ ਹੋਰ ਸ਼ਹਿਰ ਵੀ ਰਾਸ਼ਟਰੀ ਅਤੇ ਅੰਤਰਰਾਸ਼ਟਰੀ ਰੂਟਾਂ ਨਾਲ ਜੁੜਣਗੇ।